Anak ugrhang nan baduo tu yo sonsin bona. Saili samudiak, konco palangkin, namun baitu sakali sakali ado juo basitongka – konco ogrhek lawan kogrhe. Nan sogrhang gopuak pendek bagolai Gombelakun. Nan sogrhang lai alui tenggi bagolai Kuwijogiak.
Tiok potang inyo batomu di pale-pale Tak Siyun, nan maheranan awak hobbynyo samo, raun sabolik bajalan kami sambia maota-ota. Indak abi-abi o bahan nan kadiotaan, yo tadogak lo awak manyimak ota si Gombelakun jo si Kuwijogiak to nyo. Untuang-untuang bamanfaek dek kito basamo. Dek agrhi nonyan, potang tu kigrho-kigrho puku duo potang di Tak Siyun keta, Ia basarok lo kaduo konco palangkin tu, sapoti biaso raun sabolik ciek lu, kini kito raun ka ili ten, tuwik jalan keta, tibo beko di lubuak nan godang baru tuwik jalan oto.
“Ei, Mbe …” kini awak jalan torui, indak ado bonti-bonti do, ang indak bulia minta manas do !” kecek si kuwijogiak ka si Gembelakun.
“Jadi … na, den asese jo manuwik kondak ang jo. Wi … !” jowek si Gombelakun.
“Wi, sabonanyo awak indak bulia bajalan kaki tuwik jalan keta ko lai, sobok kini keta indak tontu jam lalunyo lai, ciek lai keta kini kancang. La banyak kajadian, ugrhang nyo giliang dek keta. Klakson keta ompi soman jo klakson oto, paya awak mambensoannyo.” kato si Gombelakun maota sambia bajalan jo si Kuwijogiak mailien jalan keta, sedang bajalan tu nyo malengong-lengong kasuok jo kakida maliek-liek kampuang nan nyo lalui. Dek lomak ota, indak tau inyo la sampai di Lubuak Nan Godang, inyo togak-togak sabonta maliek tangayi. “Ondeh … co like dek ang, Mbe. Yo sabona godang ai dek kotang malam, agak jo lah, ujan sajak siang kotang sampai tonga malam yo lobek-kecek ugrhang ai godang bulan Oktober 2001 ko lobiah godang dari ai godang di taun 1961 dulu, den kotang malam kotu ujan tu lai kalua, Ei … abi anyuik kasadonyo karamba ikan, titi sungai duyian, taronak ayam jo itiak panduduak nan bauma ditopi tangai, luluik tonde sadonyo, olun lai tana panduduak nan nyo kiki dek ai godang tu, mmm …. banyak juo karugian” kecek si Kuwi ka si Gombe, sambia mambuang puntuang rokok Kaiser nan la tapuntuang nyo isok jak tako. Dek lamo lambek bajalan kini nyo la bajalan tuwik jalan oto, towi kaiili. “Ati-ati, Wi .., jalan oto la lowe, Ia duo kali lipek biaso, oto la kancang-kancang, sajak proyek pelebaran jalan dari Lubuak Lasi ka Muarokalaban, banyak jalan nan bengkok tu la nyo paluwi, kini Ia bulia dikatokan 75% siap. Den tu agak come juo sangenek, anak jo kamanakan nan poi sakola ado nan ka Muhammadiyah, ado nan ka SDI, ado nan ka SD Balai, ka SD Tak Siyun. Nyo bajalan kaki jo dagrhi uma, kotu ka manyabogrhang jalan keta badobak-dobak jantuang den dek inyo.” kecek si Gombelakun sambia mangga wuik-gawuik kapalonyo nan indak gatai. Jalan towui bagulambek-gulambek.
“Coliak dek ang, mbe .., Taman Maqam Pahlawan la ancak, indak somak lai kini la ado tuang barosiannyo, Nyo gaji dek pama-renta tapi nan ancak ado jo sakali-sakali bago-tongroyong. Inyo Ia baorban jiwanyo untuak mardeka sapoti nan awak kinyan kiniko. La patuik lo awak maharagoi joso baliau tu. Kan iyo baitu nak mbe ..”. “Iyooooo …” jowek si Gombelakun. “Ko indak, kadang-kadang ado lo ugrhang awak … jan kabagotong royong mambarosian Maqam Pahlawan ko lai, datang kasinan jo indak ado. Kok dapek nan Wi … jaan baitu bona sakali-kali datang juolah mando’a, baziarah kakiyun, untuang-untuang manjadi amal dek awak ndak o, … !
Kaduo konco orghek lawan korghe samo-samo maapui tangannyo kamuko sambia mangucek kato : Amin !
ndak taraso la tibo di Cintomoni torui ka tanah lapang duduak di tribune maisok rokok Kaiser. “Tribune awak ko la agak para lo, atok la tigrhi, pakayuannyo la lapuak, parolu dipelok total. Kok indak, bisa babayo isuak – Come jo awak nak, mbe …”. “Iyo … Wi, Tanah lapang untuak main bal di nagori awak ko kan saincai, ko nyo …. indak ado nan lain lai. Wajib awak mamaliaronyo, kini awak kumpuan piti, baiyo-iyo – awak pelok liak !
“Wi … iko iyo mambona sabole jo kapalo – Nan kababaliak ko den indak tolok lai bajalan kaki, do … sosak ongok den – baapo kok awak baliak jo ojek jo la. Ojek kan la banyak lo dinagori awak ko, masuak ka tiok kampuang.
Asa lai bisa nyo tompua dek Honda, ojek masuak kakiyun. Tukang ojeknyo kan lai anak-anak mudo ugrhang awak juo. Kan lobia elok bitu daripado manganggur, yo ndak, Wi … ?”
“Aaaaa … tu ado ojek duo, ha …. ha …. Baliak awak lai, balagrhi stek, agrhi nak ujan, beko basa kuyuik lo awak …”.
Cau !
Adios !
Permios !
Ngos-ngos !
Selamat tinggal, cintomoni !.
Sumber : Koba PKS, edisi Adiak Nan Jolong Tobik, Desember 2001 oleh Djasril Abdullah
Mancigok Sapasang Konco Palangkin Nan Sadang Raun Sabolik | Silungkang Dalam Sejarah
